Бишкек, 17.07.26 /Кабар/. Бишкек шаарынын мэринин орун басарынын милдетин аткаруучу Рахат Мусаева Ленин районунда жайгашкан муниципалдык спорттук базаларды жана мекемелерди кыдырып текшерди. Бул тууралуу мэриядан билдиришти.
Текшерүүнүн жүрүшүндө объектилердин техникалык жана санитардык абалына, айланасын көрктөндүрүү жана жашылдандыруу иштерине, жаңы окуу жылына карата спорттук инфраструктуранын даярдыгына, ошондой эле мекемелердин спорттук инвентарлар, машыктыруучу жана медициналык жабдуулар менен камсыз болушуна өзгөчө көңүл бурулду.
Жыйынтыгында мекеме жетекчилерине объектилердин ишинин натыйжалуулугун жогорулатуу, материалдык-техникалык базаны чыңдоо, санитардык абалды талаптагыдай камсыз кылуу жана аныкталган кемчиликтерди өз убагында жоюу боюнча бир катар тапшырмалар берилди.
Мындан тышкары, жаңы окуу жылына даярдыктын алкагында бардык мекемелерге объектилерди пайдаланууга 100 пайыз даяр абалга келтирүү, кабыл алуу жол-жоболорун өз убагында өткөрүү жана тиешелүү ыйгарым укуктуу кызматтардан даярдык актыларын алуу милдеттендирилди.
