Бишкек, 31.10.25. /Кабар/. Бүгүн "Жашыл мурас" улуттук өнөктүгүнүн алкагында "Чоң-Кемин" мамлекеттик жаратылыш паркында көчөт отургузуу иш-чарасы өткөрүлдү.
Көчөт отургузуу Жаратылыш ресурстары, экология жана техникалык көзөмөл министрлиги тарабынан Коомчулукту өнүктүрүү жана инвестициялоо агенттиги менен биргеликте уюштурулду.
Иш-чаранын жүрүшүндө Кичи-Кемин токой бөлүмүнүн аймагына 4 гектар аянтка 2000 кайың көчөтү отургузулду.
Иш-чарага министр Медер Машиев, агенттиктин директору Марс Наспеков жана 200гө жакын кызматкерлер катышты.
Бак отургузуу иш-чарасы 23-октябрь – Эл аралык Ак илбирс күнүнө арналды. Ак илбирс — тоо экосистемаларынын тең салмактуулугунун символу. "Чоң-Кемин" мамлекеттик жаратылыш паркында учурда 11 илбирс байырлайт.
Министр Машиев белгилегендей, "Жашыл мурас" өнөктүгүнүн максаты — өлкө аймагындагы жашыл аянттарды кеңейтүү жана келечек муундар үчүн таза экологиялык чөйрө түзүү.
2025-жылы бул өнөктүктүн алкагында республика боюнча 8 млн 300 миңден ашуун көчөт отургузулду.
