Бишкек, 21.01.26 /Кабар/ Араван районунун Сары-Таш айылында 200 гектар жерге жалпы кубаттуулугу 105 МВт болгон күн электр станциясын курулат.
Президенттин Ош облусундагы өкүлчүлүгүнөн билдиришкендей, бүгүн облус башчысы Аманкан Кенжебаев Араван районуна болгон иш сапарынын алкагында аталган аймактагы жер менен таанышып, тиешелүү жетекчилердин маалыматын укту.
Белгилүү болгондой, станция сырттан келген инвесторлордун каражатынын эсебинен курулат. Күн панелдерин орнотуунун биринчи этабы жаз айларында башталып, анда 15 МВттан жогору кубаттуулуктагы электр энергиясы өндүрүлө баштайт.
Ал эми экинчи этапта курулуш толук аяктап, жалпы кубаттуулук 105 МВтка жетет. Жалпы жонунан 450 миңге жакын күн панелдери орнотулат. Инвестициянын жалпы наркы 65 млн АКШ долларын түзүп, 35 жергиликтүү тургун туруктуу жумуш орду менен камсыз болушу күтүлүүдө.
