Бишкек, 10.10.26. /Кабар/. Бишкекте климаттын өзгөрүшүнө байланышкан көйгөйлөрдү чечүүгө жаштарды тартууга багытталган LCOY Kyrgyzstan 2026 улуттук жаштар климаттык конференциясы өттү.
Жаратылыш ресурстары министрлигинен билдиришкендей, иш-чарада өлкөнүн ар кайсы аймактарынан келген жаштар, мамлекеттик органдардын, эл аралык уюмдардын жана эксперттик коомчулуктун өкүлдөрү климаттык көйгөйлөрдү талкуулап, практикалык сунуштарды иштеп чыгышты. Ошондой эле Digital4Climate.KG жаштар хакатонунун жыйынтыктары тааныштырылды.
Конференциянын жыйынтыгында жаштардын климаттын өзгөрүшү жана туруктуу өнүгүү боюнча сунуштарын камтыган Кыргызстандын 2026-жылга карата жаштар климаттык резолюциясын даярдоо каралган. Документ тиешелүү мамлекеттик органдарга, эл аралык уюмдарга жана жаштардын климаттык тармактарына сунушталат.
