Бишкек, 10.02.26. /Кабар/. Жаратылыш ресурстары, экология жана техникалык көзөмөл министрлигинин Ысык-Көл облустук башкармалыгынын жаңы имаратынын курулушу башталды. Бул тууралуу ведомстводон маалымдашты.
Иш-чарага катышкан министр Медер Машиев жаңы имараттын курулушун маанилүү окуя катары белгилеп, бул долбоор аймак үчүн гана эмес, жалпы өлкө үчүн маанилүү окуя экенин айтты. Жаңы имарат экологиялык коопсуздукту камсыздоого, мамлекеттик көзөмөлдү күчөтүүгө жана Ысык-Көлдүн уникалдуу жаратылышын сактоого багытталган маанилүү кадам болорун кошумчалады.
Ошондой эле ал президенттин жарлыктарын аткаруунун алкагында 2025-жылы облус аймагында 98 рейд өткөрүлүп, мыйзамсыз орнотулган 30,6 чакырым синтетикалык балык уулоочу торлор жок кылынганын, келтирилген зыян үчүн 3 млн сомдон ашык суммага доо арыздар коюлганын айта кетти.
Курулуш иштерин президенттин Иш башкармалыгына караштуу "Мамлекеттик имараттар департаменти" мамлекеттик мекемеси жүргүзүүдө. Курулуш иштерин 2026-жылдын 31-августуна чейин бүтүрүү пландалууда. Долбоорду ишке ашырууга министрликтин каражаттарынан 79 млн сом бөлүнгөн.
