Бишкек, 11.07.25./Кабар/. Жалал-Абад шаарында "Коопсуздук - 2025" форуму өттү. Бул тууралуу Ички иштер министрлигинен билдиришти.
Форум Өзгөчө кырдаалдар министрлиги жана жергиликтүү бийлик органдары менен биргеликте уюштурулган.
Иш-чарага ИИМдин Коомдук коопсуздук кызматынын башчысынын орун басары Нурлан Исмаилов, бөлүм башчысы Нуржан Адылова, облустук милициянын башчысы Марлис Асанов жана башкалар катышты.
Форум коомдук коопсуздук, укук бузуулардын алдын алуу, үй-бүлөлүк баалуулуктарды бекемдөө жана туризмди өнүктүрүү маселелерин талкуулай турган аянтча болду. Айрыкча, укуктук маданиятты калыптандырууга жана жарандардын укуктарын урматтоого өзгөчө көңүл бурулду.
Форумдун максаты - эл аралык кызматташтыкты чыңдоо жана коомдук коопсуздукту камсыздоого жарандарды кеңири тартуу. Бул мыйзамдарды сактоону, айлана-чөйрөнү коргоону жана өлкөнүн өнүгүүсүнө активдүү катышууну камтыйт. Жакынкы келечектеги артыкчылыктуу багыт катары "коопсуз туризмди" өнүктүрүү тапшырмасы коюлду.
ИИМ кызматкерлери укук бузуулардын, мыйзамсыз миграциянын жана экстремизмдин алдын алуу боюнча видеотасмаларын тартуулашып, куралдуу түзүмдөрдүн жоокерлери атайын көрсөтмө программаларды аткарышты. Ошондой эле балдар үчүн спорттук оюндар жана интерактивдүү аянтчалар уюштурулду.
Эскерте кетсек, форум Коомчулуктардын туруктуулугун бекемдөө үчүн глобалдык фондунун (GCERF), "Кыргызстандагы SOS-балдардын айылдары" коомдук фондунун жана Кыргызстандын Кызыл жарым ай коомунун колдоосу менен өткөрүлдү.
