Бишкек, 15.07.25. /Кабар/. Бүгүн Жалал-Абад шаарында реконструкциялоодон өткөн М.Исакулов жана Эркиндик көчөлөрү пайдаланууга берилди. Бул тууралуу муниципалитеттен билдиришти.
Иш-чарага шаар мэри Эрнисбек Ормоков катышып, аталган көчөлөр буга чейин тар жана тегиз эмес болуп, айдоочуларды бир топ түйшүккө салып келгенин белгиледи. Ондоо иштеринин алкагында жолдор кеңейтилип, атайын унаа токтотуучу жайлар дагы каралганын белгиледи.
М.Исакулов көчөсүнүн асфальт төшөлгөн бөлүгү 420 метр, туурасы 13,5 метрди түзөт. Ал эми Эркиндик көчөсүнүн кеңейтилип, асфальт төшөлгөн бөлүгү 210 метрди, туурасы 14 метрди түзөт.
Белгилей кетсек, аталган көчөлөргө асфальт төшөөдөн сырткары эки тарабына тротуар куруу, темир-бетон арык куурларын жаткыруу жумуштары да жүргүзүлдү.
Курулуш иштерин жергиликтүү бюджеттин эсебинен мэриянын жол башкармалыгы жүргүздү.
