Бишкек, 05.11.25. /Кабар/. Жалал-Абад облусунун аймагында атайын техникаларды кураштыруучу завод куруу маселеси талкууланды. Маселе президенттин Жалал-Абад облусундагы өкүлү Тилек Текебаевдин кытайлык инвестор Чжан Мэн менен жолугушуусунда көтөрүлдү.
Өкүлчүлүктөн билдиришкендей, жолугушууга Манас шаарынын мэри, ошондой эле Сузак, Базар-Коргон жана Ноокен райондорунун башчылары катышты.
Ыйгарым укуктуу өкүл Тилек Текебаев долбоордун маанилүүлүгүн белгилеп, анын кубаттуулугу жана өндүрүш багыттары тууралуу кеңири маалымат алды. Ошондой эле ал жергиликтүү бийлик жетекчилерине завод курууга ылайыктуу жер тилкелерин көрсөтүп, тиешелүү сунуштарды даярдоо боюнча тапшырма берди.
