Бишкек, 17.03.26. /Кабар/. Бүгүн Аксы районунун Боспиек айылындагы "Шейит мазарында" 2002-жылкы кайгылуу окуяда курман болгон жарандар эскерилди. Бул тууралуу президенттин Жалал-Абад облусундагы өкүлчүлүгүнөн билдиришти.
Эскерүү иш-чарасында сөз сүйлөгөн облус башчысы Тилек Текебаев Аксы окуясы өлкө тарыхындагы маанилүү бурулуштардын бири катары бааланарын белгиледи.
Анын айтымында, бул окуя мамлекеттүүлүктү бекемдөөдө элдин биримдиги, тынчтык жана мыйзамдуулук сыяктуу баалуулуктардын маанисин көрсөткөн. Ошондой эле ал каза болгон жарандардын жакындарына көңүл айтты.
Иш-чаранын жүрүшүндө маркумдардын элесине арналган эстеликке гүл коюлуп, куран окулду.
Белгилей кетсек, 2002-жылдын 16-17-март күндөрү Аксы районунда болгон коогалаңда 6 жаран каза болуп, 28 адам ар кандай жаракат алган. Быйыл ыйгарым укуктуу өкүлдүн резервдик фондунан каза болгон жана жабыркаган жарандардын жакындарына материалдык жардам көрсөтүлдү.
