Бишкек, 31.03.25. /Кабар/. Улуттук коопсуздук мамлекеттик комитетинин төрагасы Камчыбек Ташиевдин демилгеси менен Жалал-Абад облусунда ири экологиялык кампания жүрүп жатат.
Өзгөчө кырдаалдар министрлигинен билдиришкендей, анын алкагында 100 гектар аянттагы какыраган адырларга 40 миң көчөт отургузулуп, аймактагы экологиялык абалды жакшыртууга чоң салым кошот.
УКМКнын төрагасы Камчыбек Ташиев долбоордун маанисин баса белгилеп: «Табиятка инвестиция салуу – бул биздин экологиялык коопсуздукка жана Кыргызстандын жарандарынын жыргалчылыгына кошкон узак мөөнөттүү салымыбыз», – деп белгиледи.
Долбоордун алкагында жаңгак, мисте, бадам, алма, карагай, өрүк жана башка ийне жана жазы жалбырактуу дарактар тигилүүдө.
Көчөттөрдүн натыйжалуу өсүшүн камсыздоо үчүн израилдик заманбап сугат системасы орнотулууда. Аны Түркиядан келген адистер ишке киргизип, көп жылдык пайдаланууга ылайыкташтырат.
Иш-чарага өзгөчө кырдаалдар министри Бообек Ажикеев, министрликтин өкүлдөрү, УКМКнын кызматкерлери, ошондой эле Токой чарбасынын адистери катышты.
