Бишкек, 17.09.25 /Кабар/. Кара-Суу районуна караштуу Кайрагач айылында 275 орундуу жаңы мектептин курулушу соңуна чыгып калды.
Курулуш, архитектура жана турак жай-коммуналдык чарба министрлигинен билдиришкендей, объект республикалык бюджеттин эсебинен каржыланды. Курулуштун жалпы наркы 105 млн сомду түздү.
Жаңы билим уясы төрт блоктон турат: эки кабаттуу окуу корпусу, өтмө галерея жана спорт залы. Жалпы аянты 2 262 чарчы метрди түзүп, заманбап стандарттарга ылайык курулду.
Эске салсак, мектептин эски имараты 1960-жылы ашар жолу менен курулуп, болгону 90 окуучуга ылайыкталган.
