Бишкек, 04.10.25. /Кабар/. Жакында Ак-Талаа районуна караштуу Кош-Дөбө айылында 20 орундуу оорукана пайдаланууга берилет.
Курулуш, архитектура жана турак жай-коммуналдык чарба министрлигинен билдиришкендей, курулуштун наркы 65 млн сомду түзгөн.
Объект республикалык бюджеттин эсебинен каржыланып, курулуш иштери 2024-жылы башталган.
Жалпы аянты 721 чарчы метрди түзгөн оорукана эки блоктон турат. Эки кабаттуу имарат заманбап талаптарга жооп берген жабдуулар менен камсыздалып, азыркы тапта бейтаптарга кызмат көрсөтүүгө даярдалууда.
Бул долбоорду ишке ашыруу аймактагы инфратүзүмдү жакшыртууга багытталган.
