Бишкек, 23.04.26. /Кабар/. Чүйдүн Жайыл районундагы Кайырма суу каналына бетон катмарын төшөө иштери жүргүзүлүүдө. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Каналдын жалпы узундугу 10 123 метрди түзүп, анын 2 500 метрине бетон катмары төшөлүүдө. Бул жалпысынан 13 610 квадрат метр аянтты түзөт.
Курулуш иштерине мамлекеттик бюджеттин капиталдык салымдар беренеси боюнча 35 млн 386 миң сом бөлүнгөн.
Бетон катмарын төшөө иштери аяктаса, 2 154 гектар жер аянтын сугат суусу менен камсыздоо жакшырат.
Аталган канал 1966-жылы ишке берилген. Анын суу өткөрүү жөндөмдүүлүгү буга чейин секундасына 3 куб метрди түзсө, оңдоо иштери аяктагандан кийин суунун өтүмдүүлүгү кыйла жогорулайт.
