Бишкек, 17.07.25 /Кабар/. Жайыл районунда 1 тоннадан ашык кара куурай жок кылынды. Бул тууралуу Чүй облустук милициясынан билдиришти.
Күн мурун райондук ички иштер бөлүмүнүн кызматкерлери тарабынан "Кара-Куурай" иш-чарасы өткөрүлдү. Анда милиция кызматкерлери жергиликтүү бийлик өкүлдөрү менен биргеликте жапайы өскөн кара куурайды жок кылуу максатында иш алып барышты.
Иш-чаранын алкагында райондун аймагындагы кара куурай өскөн жерлер аныкталып, 1 тоннадан ашык жапайы кара куурай жок кылынды.
Ошондой эле милиция кызматкерлери жергиликтүү тургундарга баңгизат камтыган өсүмдүктөрдү өстүрүүгө жана колдонууга тыюу салынганын түшүндүрүштү.
