Бишкек, 23.07.26. /Кабар/. Бишкектеги Жайыл баатыр көчөсүнүн Чортокев көчөсүнөн Алыкулов көчөсүнө чейинки тилкесинде жашылдандыруу жана көрктөндүрүү боюнча комплекстүү иштер жүргүзүүдө.
Муниципалитеттен билдиришкендей, аталган көчөнүн бөлүүчү тилкесинде даярдык иштери аткарылып, жер кыртышы төмөндөтүлүп, көчөттөрдү талаптагыдай сугарууну камсыз кылган заманбап сугат системасы орнотулду.
Бүгүнкү күндө жабык тамыр системалуу 83 даана ири көлөмдөгү штамбдуу акация көчөттөрү отургузулду.
Мындан ары бул тилкеде газон төшөө, бир жылдык гүлдөрдү отургузуу жана аймакты көрктөндүрүү боюнча кошумча иштерди жүргүзүү пландалууда.
