Бишкек, 19.03.25. /Кабар/. Өзгөн районуна караштуу Эркин-Тоо айылындагы мектеп 37 млн сомго капиталдык оңдоодон өтүүдө. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, оңдоо иштери окуучулар жана мугалимдер үчүн ыңгайлуу жана коопсуз шарттарды түзүү максатында жүргүзүлүүдө.
Жумуштардын жалпы наркы 37 миллион сомду түзөт. Оңдоо иштеринин алкагында мектептин чатыры жана терезелери толугу менен жаңыланат, жылуулук системасы модернизацияланат, ашкана капиталдык оңдолот.
Мындан тышкары, имараттын сырткы фасады жаңыланып, ички жасалгалоо иштери жүргүзүлүүдө.
Капиталдык оңдоо иштерин бүткөрүү жана мектепти окуучулар үчүн ачуу быйылкы жылга пландаштырылган.
