Бишкек, 10.11.26 /Кабар/. Өзгөн районунун Большевик айылында Ибраимов Зергербай атындагы кичи футбол аянтчасы курулуп, пайдаланууга берилди.
Президенттин Ош облусундагы өкүлчүлүгүнөн билдиришкендей, долбоордун жалпы наркы 13 млн 979 миң 418 сомду түздү. Анын ичинен 10 млн сом Ош облустук өнүктүрүү фондунан, 979 миң 418 сом жергиликтүү бюджеттен, ал эми 3 млн сом жергиликтүү жамааттын салымынан каржыланды.
Иш-чарага катышкан облус башчысы Аманкан Кенжебаев жаштардын ден соолугун чыңдоо, спортту өнүктүрүү жана сергек жашоо образын жайылтуу мамлекеттик саясаттын артыкчылыктуу багыттарынын бири экенин белгиледи.
Жергиликтүү тургундар жаңы спорттук аянтчанын курулушуна салым кошкон бардык тараптарга ыраазычылык билдиришти.
