Бишкек, 01.06.26. /Кабар/. Өзгөн районунда тиешелүү уруксат кагаздары жок, өз билемдик менен курулуп жаткан өндүрүш цехтеринин курулушу токтотулду. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, көзөмөл иш-чараларынын жүрүшүндө Кароол айыл аймагында жайгашкан пластик жана таш өндүрүүчү цехтердин курулуш иштери уруксат берүүчү документтерсиз жүргүзүлүп жатканы аныкталган.
Мындан тышкары, бул объектилер курулуш объектилеринин мамлекеттик реестрине да катталган эмес.
Мындай аракеттер "Шаар куруу жана архитектура жөнүндө" мыйзамдын талаптарын одоно бузуу болуп саналат. Мындан улам мыйзам бузуучуларга эскертүү берилип, жалпы суммасы 200 миң сом айып салынды.
Бардык тиешелүү документтер мыйзам талаптарына ылайык толук таризделгенге чейин курулуш иштери толугу менен токтотулду.
