Бишкек, 22.05.25. /Кабар/. Бүгүн Өзгөн районунун Мырза-Аке айылында 60 орундуу жаңы заманбап оорукана ачылды. Бул тууралуу Курулуш, архитектура жана турак жай-коммуналдык чарба мамлекеттик агенттигинен билдиришти.
Иш-чарага министрлер кабинетинин төрагасы Адылбек Касымалиев катышты.
Жаңы оорукана заманбап стандарттарга ылайык курулган. Үч кабаттан жана эки блоктон турган имаратта төрөт, терапия, хирургия, педиатрия жана тез жардам бөлүмдөрү бар. Ал заманбап медициналык жабдуулар — ӨЖД (ИВЛ) аппараттары, УЗИ, рентген жабдуулары жана лабораториялык жабдыктар менен камсыздалган.
Долбоор республикалык бюджеттин эсебинен ишке ашырылды.
