Ташкент, 15.10.25. /Кабар/. Өзбекстандын паспорту Henley Passport Index рейтингинде он орунга төмөндөп, 82-орунду ээледи. Эми өзбек жарандары визасыз же келген учурда берилүүчү виза менен 61 өлкөгө гана бара алышат. Бул көрсөткүч мурдагы советтик мамлекеттердин көбүнөн төмөн.
Өзбекстан бул позицияны Африкадагы Мозамбик жана Сан-Томе жана Принсипи мамлекеттери менен бөлүшүүдө.
Рейтингде биринчи орунду Сингапур ээлеп турат — бул өлкөнүн жарандары визасыз 193 мамлекетке бара алышат. Экинчи орундарды Түштүк Корея жана Япония ээлешкен.
Белгилей кетсек, сентябрь айында Өзбекстан 72-орунда турган. Черногория жакында эле Өзбекстан, Армения жана Египет жарандарынан убактылуу визасыз тартипти алып салган. Бул чечим өлкөнүн виза саясатын Европа Биримдигинин талаптарына шайкеш келтирүү максатында кабыл алынган.
