Бишкек, 06.11.26. /Кабар Казакстан мунай продуктуларынын айрым түрлөрүн автомобиль жана темир жол аркылуу, ошондой эле ЕАЭБден тышкары экспорттоого убактылуу чектөөлөрдү киргизип жатат. Казинформ билдиргендей, тиешелүү буйрукка Казакстандын энергетика министри Ерлан Аккенженов кол койгон.
Чектөөлөр алты айга чейин күчүндө болот. Бирок тыюу салынган продукциялардын мөөнөтү жана тизмеси транспорттун түрүнө жана бара турган жерине жараша.
Мисалы, 2026-жылдын 22-ноябрынан 2027-жылдын 22-майына чейин бензинди, дизелдик отунду жана мунай продуктуларынын айрым түрлөрүн автомобиль транспорту менен экспорттоого тыюу салынат. Майлоочу майларга, ошондой эле өндүрүүчү тарабынан орнотулган унаалардын цистерналарындагы күйүүчү майга өзгөчө эреже каралган. Ошондо да мындай цистерналар менен күнүнө бир жолудан гана чыгууга уруксат берилет.
Изилдөө жана иштеп чыгуу, сыноо, өнөр жай өндүрүшүнө колдонулган авиациялык күйүүчү майды чыгарууда да өзгөчө тартип бар. Бул үчүн ыйгарым укуктуу органдын макулдугу, тиешелүү уюм менен келишим жана күйүүчү майдын керектүү көлөмүн көрсөткөн документтер талап кылынат. Мунай продуктуларын гуманитардык жардам катары экспорттоого Казакстан өкмөтүнүн чечими менен да уруксат берилет.
Алты айлык тыюу салуу мунай продуктуларын темир жол аркылуу ташууга да киргизилген. Дагы бир чектөө 2027-жылдын 1-январынан 30-июнуна чейин күчүндө болот. Ал жеңил дистилляттарды, реактивдүү отунду, дизель отунун, газ майларын, толуолду, ксилолду жана мунай битумун ЕАЭБдин бажы аймагынан тышкары экспорттоого тиешелүү.
Буйрук 2026-жылдын 16-ноябрынан тартып күчүнө кирет.
Буга чейин Казакстан 2026-жылдын 21-майынан 21-ноябрына чейин мунай продуктуларынын айрым түрлөрүн экспорттоого убактылуу тыюу салары кабарланган.
