Бишкек, 23.10.25 /Кабар/. Өзбекстандын жалпыга маалымдоо каражаттарынын өкүлдөрү Баткен облусуна иш сапары менен келишти.
Президенттин Баткен облусундагы өкүлчүлүгүнөн билдиришкендей, медиа өкүлдөрүн Баткен облусунун башчысы Айбек Шаменов кабыл алды.
Жолугушууда эки элдин ортосундагы достук жана ынак коңшулаштык мамилелерди чыңдоо, чек ара аймактарында кызматташууну кеңейтүү жана туризм тармагын өнүктүрүү маселелери талкууланды. Ошондой эле маалымат мейкиндигиндеги өз ара кызматташтыкты арттыруу, чектеш аймактарда биргелешкен долбоорлорду ишке ашыруу боюнча пикир алмашуулар болду.
Иш сапардын жүрүшүндө өкүл Айбек Шаменов конокторго жакында курулушу баштала турган “Жаңы Баткен” экологиялык шаары тууралуу маалымат берип, долбоордун максаттары жана багыттары менен тааныштырды.
Өзбекстандын медиа өкүлдөрү УТРК “Баткен” телеканалына жана «Баткен таңы» облустук гезитине барышып, жергиликтүү маалымат каражаттарынын ишмердүүлүгү, техникалык мүмкүнчүлүктөрү жана маалымат таратуу шарттары менен жакындан таанышышты. Кыргызстандын алыскы аймагында иш алып барган журналисттер үчүн түзүлгөн шарттар, заманбап жабдуулар жана маалыматты ыкчам жеткирүү мүмкүнчүлүктөрү өзбекстандык коноктордун өзгөчө кызыгуусун жаратты.
Андан сырткары, УТРК “Баткен” телеканалынын түз эфиринде эки өлкөнүн журналисттери маалымат аркылуу ынтымакты жана кызматташтыкты чыңдоонун мааниси тууралуу маектешишти.
Мындай жолугушуулар эки өлкөнүн медиа өкүлдөрүнүн ортосунда тажрыйба алмашууну тереңдетүүгө, маалымат мейкиндигиндеги байланыштарды чыңдоого жана чек ара аймактарында биримдикти бекемдөөгө өбөлгө болот.
Белгилей кетсек, бул иш-чаралар Кыргызстандын президенти Садыр Жапаров жана Өзбекстандын президенти Шавкат Мирзиёев кол койгон эки тараптуу кызматташтык боюнча документтердин алкагында ишке ашырылууда. Буга чейин Баткен облусундагы журналисттер Фергана облусуна иш сапар менен барып келишкен.
