Ташкент, 25.05.25 /Кабар/. Өзбекстан менен Монголия ортосунда кеңири өнөктөштүк мамилелер расмий түрдө түзүлдү. Улан-Батор шаарында өткөн жогорку деңгээлдеги жолугушууда президенттер Шавкат Мирзиёев жана Ухнаагийн Хурэлсух биргелешкен декларацияга кол коюшту, деп билдирет өлкө башчысынын басма сөз кызматы.
Маалыматка ылайык, бул документ эки өлкөнүн ортосундагы кызматташтыкты сапаттуу жаңы баскычка көтөрөт. Мамлекет башчылары бул тарыхый кадамды өз ара ишенимге, прагматизмге жана туруктуу өнүгүүгө негизделген өнөктөштүк катары мүнөздөштү.
Сүйлөшүүлөр учурунда тараптар соода-экономикалык байланышты кеңейтүү, өз ара товар жүгүртүүнү бир нече эсеге көбөйтүү, ошондой эле инвестициялык чөйрөнү коргоо жана жеңилдетүү боюнча макулдашышты.
Тоо-кен тармагында геологиялык чалгындоо, ресурстарды иштетүү, технологияларды алмашуу жана адистерди даярдоо жаатында кызматташтыкты тереңдетүү маселеси баса белгиленди. Айыл чарбасында эт-сүт, жүн жана тери продукцияларын кайра иштетүү боюнча биргелешкен кластерлерди түзүү сунушталды.
Транспорт жана логистика маселелери да көңүл чордонунда болду. Тараптар быйыл жыл аягына чейин Ташкент менен Улан-Батордун ортосунда түз аба каттамын ачуу эрежелерин жарыялашты. Ошондой эле деңизге чыгуу мүмкүнчүлүгү жок өлкөлөр үчүн эң натыйжалуу транспорттук коридорлорду аныктоо боюнча биргелешкен изилдөөлөрдү жүргүзүү демилгеси көтөрүлдү.
Маданият жана билим берүү тармагындагы кызматташтык дагы бир артыкчылыктуу багыт катары белгиленди. Улан-Батордо өтүп жаткан Өзбекстандын маданият күндөрү жогору бааланып, мындан ары да маданий-гуманитардык байланыштарды бекемдөө боюнча макулдашылды. Монголиялык студенттер үчүн өзбек жогорку окуу жайларынан квота бөлүү тууралуу да чечим кабыл алынды.
Жыйынтыгында, тараптар жетишилген макулдашуулардын толук жана өз убагында ишке ашырылышын камсыз кылуу максатында атайын «Жол картасын» кабыл алуу тууралуу келишимге келишти.
Мындан тышкары, президенттердин катышуусунда экономика, соода, саламаттык сактоо, билим берүү, маданият, туризм, транспорт жана спорт тармактарында кызматташууну камтыган бир катар ведомстволор аралык документтерге да кол коюлду.
