Бишкек, 20.04.26. /Кабар/. 19-апрелде Ысык-Көлдө браконьерликке каршы кезектеги рейд өттү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Рейддин жүрүшүндө инспекторлор тарабынан Ысык-Көлдөн жалпы узундугу 1200 метрди түзгөн эски синтетикалык тор табылып, суудан чыгарылды.
"Учурда бул багыттагы иштер улантылып, мыйзамсыз балык уулоого каршы күрөш күчөтүлүүдө. Тиешелүү чаралар көрүлүп, күнөөлүү жактар аныкталууда", - деп айтылат маалыматта.
Белгилей кетсек, иш-чара президенттин жарлыгын аткаруунун алкагында уюштурулуп, көлдүн акваториясында мыйзамсыз балык уулоого каршы багытталды.
