Бишкек, 12.09.25 /Кабар/. Ысык-Көлдү тазалоо иштери активдүү уланууда. Бул тууралуу президенттин маалымат катчысы Аскат Алагөзов билдирди.
Анын айтымында, президент Садыр Жапаровдун тапшырмасына ылайык тийиштүү кызматтар Ысык-Көлдү торлор жана таштандылардан тазалоону активдүү улантышууда.
Белгилей кетсек, буга чейин мамлекет башчы жарандарга кайрылып, мыйзамсыз аңчылыкты токтотууга жана Кыргызстандын жаратылышын сактоого чакырган.
Президенттин билдирүүсүнө ылайык, акыркы 3 жылдан бери Ысык-Көл, Соң-Көл, Токтогул суу сактагычтарынан жыйналган торлордун узундугу 5 миң 700 километр болгон.
"Бул деген Бишкек-Москва-Санкт-Петербург шаарына чейинки аралык. Балык кармайбыз деп браконьерлер салган торлорго канаттуулар да түшүп, өлүп калып жатышат.
Ошондуктан айрыкча суу жээгинде жашаган элдерибизге кайрылам: сиздер айылыңарда кимдер браконьерлик кылаарын жакшы билесиздер. Аларды уяткарып, токтотуп, сиздер да жардам бербесеңиздер тиешелүү органдар жетишпей жатышат.
Жаратылыш баарыбыздыкы. Ошондуктан ар бириңер жарандык, атуулдук милдетиңерди аткарып, көзөмөлгө алыңыздар",-деген өлкө башчы.
