Бишкек, 29.05.26. /Кабар/. Жаратылыш ресурстары, экология жана техникалык көзөмөл министрлиги Ысык-Көл облусунда калктын экологиялык маданиятын жогорулатуу жана таштандыларды сорттоп чогултууну жайылтуу максатында экологиялык акция өткөрүүдө. Бул тууралуу "Кабар" агенттигине министрликтин Таштандыларды жана саркынды сууларды башкаруу башкармалыгынын башчысы Асел Мурзабаева билдирди.
Анын айтымында, аталган пилоттук долбоордун алкагында "Көгүлтүр Ысык-Көл" пансионатынын аймагында таштандыларды иргөөчү контейнерлер орнотулууда. Ошондой эле аймакта жүзүн таануу системалары менен жабдылган дрондор менен көзөмөлдөнүп, күзөттө турганы тууралуу эскертүү белгилери да илинген.
Ал министрлик өз ыйгарым укуктарынын алкагында өлкөдөгү жана Ысык-Көлдөгү экологиялык кырдаалды жакшыртуу үчүн мониторинг, көзөмөл жана текшерүү иш-чараларын жүргүзүп жатканын белгиледи. Бул иштер президенттин "Ысык-Көл көлүнүн экологиясын сактоо боюнча кечиктирилгис чаралар жөнүндө" жарлыгын аткаруунун алкагында жүрүүдө.
"Келечекте министрлик таштандыларды сорттоп чогултуу тажрыйбасын аймактагы башка эс алуу объекттеринин арасында да жайылтууну көздөп жатат", - деди ал.
