Бишкек, 03.06.26 /Кабар/. Ысык-Көлдүн тарыхында алгачкы жолу катардагы турнанын биринчи уя салуусу орун алды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка караганда, 19-апрелде корукчу А. Калчаев Ысык-Көл мамлекеттик жаратылыш коругунун Жети-Өгүз корукчасындагы саздан катардагы турнанын уясын тапкан. Ал эми 24-май күнү ошол эле аймактан эки балапандуу жуп турналар кездешкен.
"Учурда корукчулар куштарды коргоп, көзөмөлдөп жатышат. Коруктун илимий кызматкери С. Кулагин бул тууралуу илимий макала жазып, ал Москвадагы Евразия турналары боюнча эл аралык жумушчу топтун бюллетенине жөнөтүлдү", - деп айтылат маалыматта.
Белгилей кетсек, буга чейин өлкө тарыхында 1958-жылы гана катардагы турнанын уя салуусу Чүй өрөөнүндө катталган.
