Бишкек, 25.02.25. /Кабар/. 25-27-февраль күндөрү Ысык-Көл облусунда “Бүткүл дүйнөлүк жаныбарлардын саламаттыгын сактоо уюмунун стандарттык жол-жоболор макамын расмий таануу” деген темада тегерек стол өтүүдө.
Суу ресурстары, айыл чарба жана кайра иштетүү өнөр жайы министрлигинен билдиришкендей, иш-чараны Ветеринардык кызмат менен Бүткүл дүйнөлүк жаныбарлардын саламаттыгын сактоо уюмунун (мындан ары – БДЖССУ) Борбор Азия боюнча субрегионалдык өкүлчүлүгү биргеликте уюштурду.
Тегерек столго уюмга мүчө мамлекеттердин (Россия, Борбор Азия жана Европа) өкүлдөрү жана эскперттери катышып жатат.
Иш-чаранын жүрүшүндө аталган өлкөлөрдүн Ветеринардык кызматтарынын жетекчилери ар тараптуу кызматташуунун бардык маселелери боюнча сүйлөшүүлөрдү жүргүзүп, жаныбарлардын саламаттыгын көзөмөлдөө процедураларын андан ары күчөтүүнү көздөп жатышат.
Бул тегерек стол Кыргызстандын аймагында шарп жана кой-эчкинин кыргын ылаңдарына каршы күрөшүүнүн расмий программаларын бекитүү жана эпизоотиялык бакубаттуулук макамын колдоо максатында уюштурулууда.
Белгилей кетсек, Бүткүл дүйнөлүк жаныбарлардын саламаттыгын сактоо уюму - дүйнө жүзү боюнча жаныбарлардын саламаттыгын жакшыртуу үчүн түзүлгөн жооптуу эл аралык уюм. Ал координациялоо, колдоо, жаныбарлардын ооруларына каршы күрөшүү, азык-түлүк коопсуздугу жана жаныбарлардын саламаттыгын жакшыртуу менен алектенет.
Эл аралык уюм транспаренттүүлүктү, илимий маалыматты, эл аралык тилектештикти, Ветеринардык кызматтардын ролун бекемдөөнү жана жогорулатууну жактайт.
