Бишкек, 15.07.26. /Кабар/. 2026-жылдын 17-июлунда Кыргызстан кесиптик бирликтер федерациясы жана Билим берүү жана илим кызматкерлеринин кесиптик бирлиги тарабынан "Кызыл гвоздика" ден соолукту чыңдоо борборунун жаңы корпусунун салтанаттуу ачылыш аземи өтөт.
Мекемеден билдиришкендей, бул – өлкөнүн кесиптик бирлик кыймылы үчүн өзгөчө мааниге ээ окуя. Акыркы 30 жыл ичинде биринчи жолу кесиптик бирликтин мүчөлүк төгүмдөрүнүн эсебинен заманбап жаңы корпус курулуп, ал билим берүү тармагынын кызматкерлеринин жана алардын үй-бүлө мүчөлөрүнүн ден соолугун чыңдоого жана эс алуусуна кызмат кылат.
Жаңы имараттын курулушу кесиптик бирлик мүчөлөрүнүн каражаттары алардын өздөрүнө багытталган социалдык долбоорлорго жумшалып жаткандыгынын айкын далили болуп саналат. Бул долбоор кызматкерлердин жашоо сапатын жакшыртууга, ден соолугун чыңдоого жана заманбап эс алуу инфраструктурасын өнүктүрүүгө багытталган.
Иш-чаранын алкагында жаңы корпустун расмий ачылышы, объект менен таанышуу, коноктордун куттуктоо сөздөрү жана майрамдык концерттик программа уюштурулат.
"Кызыл гвоздика" ден соолукту чыңдоо борборунун жаңы корпусунун ачылышы Кыргызстандын кесиптик бирликтерин социалдык инфраструктурасын өнүктүрүүдөгү маанилүү тарыхый окуя болуп, кесиптик бирликтер эмгек адамдарынын ден соолугуна, бакубат жашоосуна жана социалдык корголушуна инвестиция салууну улантып жаткандыгын дагы бир жолу тастыктайт.
Өтүү күнү: 2026-жылдын 17-июлу.
Өтүү жери: Ысык-Көл облусу, Тоң району, "Кызыл гвоздика" ден соолукту чыңдоо борбору.
Башталышы: 14:00.
