Бишкек, 21.04.26. /Кабар/. Ысык-Көлдө Кырчын жайлоосуна алып баруучу жол асфальтталууда. Бул тууралуу "Кыргызавтожол" мамлекеттик ишканасынан билдиришти.
Маалыматка ылайык, быйыл мамлекеттик капиталдык салымдар беренесинин эсебинен Семёновка – Ак-Суу унаа жолунун 21 чакырымын асфальттоо каралган. Учурда жолдун 8-12-чакырым аралыгына асфальт төшөлүүдө.
Аталган жол Кырчын жайлоосуна алып баруучу негизги каттамдардын бири болуп саналат. Жолдун жаңыланышы туристтер үчүн жеткиликтүүлүктү жакшыртып, аймакка келген эс алуучулардын агымын көбөйтүүгө, ошондой эле алдыда өтө турган VI Дүйнөлүк көчмөндөр оюндарынын алкагында иш-чараларды жогорку деңгээлде өткөрүүгө өбөлгө түзөт.
Ошондой эле Григорьевка – Көл – Кашка-Суу унаа жолунун 14 чакырымы жаңыланат. Жалпысынан 34 чакырым жолду оңдоо пландалган. Учурда анын 10 чакырымына асфальт төшөлүп бүттү.
