Бишкек, 15.07.26. /Кабар/. Ысык-Көлдө чет элдик жумушчулар арасында миграциялык жана экологиялык эрежелерди сактоо боюнча түшүндүрүү иштери жүрүүдө. Бул тууралуу облустук милициядан билдиришти.
Маалыматка ылайык, Туристтик-экологиялык милиция негизги жумушчу күчү тартылган Ак-Суу районундагы ири курулуш объектилеринде рейд жүргүздү.
Анда чет өлкөлүк жарандарга мыйзамдуу каттоодон өтүү, визалык режимди жана өлкөдө жүрүү эрежелерин так сактоо талабы эскертилди.
Ошондой эле Ысык-Көл өзгөчө корголуучу биосфералык аймак болгондуктан, курулуш жүргүзгөн ишканаларга тиричилик калдыктарын туура утилизациялоо жана жаратылышка зыян келтирбөө милдеттендирилди.
Милиция курулуш компанияларынын жетекчилерин өз жумушчуларына укуктук жана экологиялык эрежелерди үзгүлтүксүз түшүндүрүп турууга чакырат.
