Бишкек 02.07.25 /Кабар/. Ысык-Көл облусунда экологиялык мыйзамдардын аткарылышына көзөмөл күчөтүлдү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Министрликке караштуу Экологиялык жана техникалык көзөмөл кызматынын инспекторлору тарабынан 27-30-июнда Ысык-Көл облусунун аймагында атайын текшерүүлөр жүргүзүлдү.
Бул иштер КР президентинин төмөнкү жарлыктарын ишке ашыруу алкагында жүргүзүлдү:
- "Ысык-Көлдө жана Соң-Көлдө балыкты өндүрмөлүк кармоого мораторий киргизүү жөнүндө";
- "Ысык-Көлдүн экологиясын сактоо боюнча кечиктирилгис чаралар жөнүндө".
Текшерүүнүн негизги максаттары:
- суу объекттеринде балык запастарын коргоо жана мыйзамсыз балык уулоонун алдын алуу;
- эс алуу жайларында жана конок үйлөрүндө саркынды сууларды тазалоочу курулмалардын туура иштешин камсыздоо;
- базарларда мыйзамсыз балык сатылышына бөгөт коюу;
- Ысык-Көлдүн жээгинде таштандыларды мыйзамсыз ыргытууга каршы күрөшүү.
Текшерүү учурунда жалпы 19 укук бузуу фактысы катталып, мыйзам бузгандарга карата жалпы 106 500 сом өлчөмүндө айып пул салынды.
Белгилей кетсек, бул иштер КР президентинин төмөнкү жарлыктарын ишке ашыруу алкагында жүргүзүлгөн.
