Бишкек, 28.07.25. /Кабар/. Ысык-Көлдө экологиялык коопсуздукту камсыздоо боюнча рейд жана текшерүү иш-чаралары жүргүзүлдү.
Жаратылыш ресурстары, экология жана техникалык көзөмөл министрлигинен билдиришкендей, Экологиялык жана техникалык көзөмөл кызматынын кызматкерлери тарабынан Ысык-Көл районунун Бает айылында жайгашкан "Ак-Жол" ЖЧК асфальт-бетон заводуна пландан тышкаркы текшерүү жүргүзүлдү.
Текшерүүнүн жыйынтыгында акт түзүлүп, 4 пункттан турган эскертме берилди.
Ошондой эле КР Укук бузуулар жөнүндө кодексинин "Атмосфералык абага зыяндуу заттардын чыгуу эрежелерин бузуу" беренеси боюнча протокол түзүлүп, ишканага 28 миң сом айып салынды. Түшүндүрүү иштери да жүргүзүлдү.
Мындан тышкары, инспекторлор Ысык-Көл райондук мамлекеттик администрациясынын комиссиясы менен биргеликте Кара-Ой айылындагы пляж аймактарына кыдыруу жана көзөмөлдөө иштерин улантууда.
Экологиялык жана техникалык көзөмөл кызматы жарандарды жана чарба субъекттерин жаратылыш ресурстарын натыйжалуу пайдаланууга, ошондой эле экологиялык талаптарды сактоого чакырат.
