Бишкек, 27.01.26. /Кабар/. Ысык-Көлдөгү жана Орто-Токой суу сактагычындагы сууга жакын жана сууда сүзүүчү канаттууларды кышкы эсепке алуу иштери жүргүзүлдү.
Жаратылыш ресурстары, экология жана техникалык көзөмөл министрлигинен билдиришкендей, санакты Улуттук илимдер академиясынын Биология институтунун кызматкерлери менен биргеликте Ысык-Көл биосфералык аймагынын дирекциясы жүргүзүүдө.
Жыл сайын – кышында, жазында жана күзүндө суу жээгиндеги жана сууда сүзүүчү канаттууларга, ошондой эле алардын Ысык-Көлдөгү чөйрөсүнө экодемографиялык мониторинг жүргүзүлөт.
Адистердин айтымында, канаттууларды эсепке алуу Борбор Азиянын миграциялык каттамдарынын маанилүү участогу болуп саналган Ысык-Көл аймагында жашаган канаттуулардын кышкы жана келгин түрлөрү менен таанышууга уникалдуу мүмкүнчүлүк берет.
"Канаттуулардын саны жана таралышы боюнча алынган маалыматтар суу объектилеринин абалын, аймактын экологиялык балансын баалоого мүмкүндүк берет жана социалдык-экономикалык абалдын көрсөткүчтөрү катары кызмат кыла алат", - деп айтылат маалыматта.
