Бишкек, 01.04.26. /Кабар/. Бүгүн, 1-апрелде Чүй облусунун Ысык-Ата районундагы Туз айылында Туз декадалык жөнгө салуу бассейнинин курулушуна капсула салынды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, Туз декадалык жөнгө салуу бассейни 1987-жылы пайдаланууга берилген. Реконструкциялоого чейин анын суу топтоо кубаттуулугу 800 миң куб метрди түзүп келген. Реконструкция иштеринен кийин бассейндин сугат суусун топтоо мүмкүнчүлүгү кыйла көбөйүп, 1 млн 947 миң куб метрге жетет.
Бул бассейн суу тартыш болгон мезгилде Туз айылынын 1300 гектар сугат жерин суу менен камсыздайт. Ал эми суу мол болгон учурларда Чоң-Далы жана Сары-Жон айылдарынын кошумча 1100 гектар сугат жерине да суу берилет.
Министр Эрлист Акунбеков долбоордун аймак үчүн маанисин белгилеп, ирригациялык инфраструктураны өнүктүрүү өлкөнүн азык-түлүк коопсуздугун камсыздоодо жана айыл чарбасын колдоодо негизги багыттардын бири экенин айтты.
"Бул суу сактагычтын реконструкциядан өтүшү аймактагы дыйкандар үчүн чоң мүмкүнчүлүк түзөт. Сугат суу менен камсыздоо жакшырып, жерлердин түшүмдүүлүгү жогорулайт. Натыйжада айыл чарба өндүрүшү көбөйүп, жергиликтүү тургундардын жашоо-шарты да жакшырмакчы", — деди министр.
