Бишкек, 30.03.26. /Кабар/. Ылай-Талаа – Гүлчө жолунун 55 чакырымы асфальтталат. Бул тууралуу Транспорт жана коммуникациялар министрлигинен билдиришти.
Маалыматка ылайык, министрдин биринчи орун басары Тариэл Жаныбеков Кара-Кулжа районундагы Ылай-Талаа – Гүлчө жолунун курулушунан кабар алды.
Ушу тапта жолдун 55 чакырымына асфальт төшөө боюнча даярдыктар көрүлүп, жолду кеңейтүү жана шагыл төгүү иштери жүрүп жатат. Долбоор боюнча жолдун туурасы 8 метрге чейин кеңейтилет. Учурда жумуштар активдүү жүрүүдө.
Ошондой эле министр Жалал-Абад, Ош жана Баткен облустарындагы Жол тейлөө мекемелеринин жетекчилери менен жыйын өткөрүп, быйылкы жылга карата пландар, аткарыла турган иштер жана алдыдагы негизги милдеттер кеңири талкууланды.
Министрдин биринчи орун басары бардык пландалган иштерди өз мөөнөтүндө так аткарууну жана аткарылып жаткан ар бир жумуштун сапатына өзгөчө көңүл бурууну белгиледи.
