Бишкек, 31.10.25. /Кабар/. Бүгүн, 31-октябрда министрлер кабинетинин төрагасынын орун басары Эдил Байсалов Каба уулу Кожомкул атындагы Спорт ордосунда VI Ислам шериктештик оюндарына катыша турган спортчулар менен жолугушту. Бул тууралуу Дене тарбия жана спорт агенттигинен билдиришти.
Маалымдалгандай, иш-чарада Кыргызстандын курама командасынын өкүлдөрү Илим Бакытбек уулу менен Айпери Медет кызына мамлекеттик туу тапшырылды.
Эдил Байсалов кыргыз спортчуларынын Ислам шериктештик оюндарындагы катышуусу өлкөнүн биримдигин чыңдоого жана спорттук мүмкүнчүлүктөрүн кеңейтүүгө чоң салым кошорун белгиледи.
“Сиздердин жетишкендиктериңер – спорт элди бириктирип, күчтүү жана мыкты кыларынын далили. Сиздердин руханий күчүңөр жана жеңишке болгон эркиңер биздин элди гана эмес, бүт дүйнөнү шыктандырмакчы. Силерге ийгилик, ишеним жана жаңы жетишкендиктерди каалайм. Ар бир күнүңөр кыялыңарга жакындатсын”, - деди ал.
Өз кезегинде Дене тарбия жана спорт мамлекеттик агенттигинин директору Казыбек Молдажиев спортчулар өлкө намысын татыктуу коргоп, жогорку жыйынтыктарга жетээрине ишенимин билдирди.
Белгилей кетсек, VI Ислам шериктештик оюндарында өлкө намысын 19 спорт түрү боюнча 137 спортчу коргойт.
