Бишкек, 07.08.25. /Кабар/. Ош, Жалал-Абад жана Баткен облустарындагы ветеринардык адистер Жаныбарларды идентификациялоо жана көзөмөлдөө системасы (ЖИКС) аркылуу санарип форматта ветеринардык отчёт түзүү жана иш алып баруу боюнча окуудан өтүштү.
Суу ресурстары, айыл чарба жана кайра иштетүү өнөр жайы министрлигинен билдиришкендей, анда катышуучулар ЖИКСке интеграцияланган электрондук формалар менен иштөөнү, малды эмдөө жана диагностикалоо боюнча маалыматтарды туура толтуруу, санариптик отчётторду түзүүдөгү кыйынчылыктарды жана алардын чечүү жолдору, маалыматтардын тактыгын жана жоопкерчилик маселелерин үйрөнүштү.
Окутуу БУУнун Азык-түлүк жана айыл чарба уюмунун (ФАО) колдоосу менен уюштурулду.
Семинардын максаты ветеринардык адистердин санарип көндүмдөрүн өнүктүрүү жана ЖИКС системасын натыйжалуу колдонууга көмөктөшүү болуп саналат.
Белгиленгендей, мындай окутуулар ветеринардык кызматты санариптештирүүдө жана анын натыйжалуулугун жогорулатууда чоң мааниге ээ.
