Бишкек, 09.07.26. /Кабар/. Кыргызстандын Австриядагы элчилигинин демилгеси жана Бириккен Улуттар Уюмунун Айлана-чөйрө боюнча программасынын (ЮНЕП) биргелешкен уюштуруусу менен Вена эл аралык борборунда "Тоолуу аймактарды туруктуу өнүктүрүү үчүн эл аралык тоо күн тартибин илгерилетүү: өнөктөштүк, эл аралык демилгелер жана Бириккен Улуттар Уюмунун ролу" аттуу тегерек стол өттү.
Иш-чарага президенттин Тоолуу аймактарды өнүктүрүү боюнча аракеттердин беш жылдыгын ишке ашыруу боюнча атайын өкүлү Динара Кемелова катышты.
Иш-чарада Кыргызстандын Австриядагы, ЕККУдагы, БУУдагы жана Венадагы башка эл аралык уюмдардагы туруктуу өкүлү Нуржан Шайлдабекова жана Австриядагы ЮНЕПтин тоолуу аймактар боюнча тобунун жетекчиси Маттиас Юрек куттуктоо сөздөрүн сүйлөштү.
Негизги баяндамаларды Динара Кемелова, ошондой эле Австриянын, ЮНИДОнун, МАГАТЭнин, ЕККУнун, Казакстандын жана Андорранын өкүлдөрү жасашты. Тегерек столдун ишине 27 мамлекеттин элчилери жана дипломатиялык өкүлчүлүктөрдүн өкүлдөрү катышты.
Жолугушууда эл аралык тоо күн тартибин алдыга жылдыруу, көп тараптуу кызматташууну чыңдоо жана тоолуу аймактарды туруктуу өнүктүрүү боюнча биргелешкен демилгелерди ишке ашыруу маселелери талкууланды.
Бул тегерек стол 2027-жылдын октябрь айында Бишкекте өтө турган Экинчи глобалдык тоо саммитинин алдында эл аралык өнөктөштүктү бекемдөөгө багытталган кезектеги практикалык кадам болуп, Кыргыз Республикасынын демилгелерин эл аралык деңгээлде илгерилетүүгө өбөлгө түзөт.
Иш сапардын алкагында Динара Кемелова ошондой эле Австриянын Улуттук кеңешинин төрагасы (парламенттин спикери) Вальтер Розенкранц, ЕККУнун башкы катчысы Феридун Синирлиоглу, Австриянын Федералдык президентинин тышкы саясат боюнча кеңешчиси Люсия Кронштайнер, ошондой эле Австриянын Тышкы иштер министрлигинин, Айыл чарба, токой чарбасы, климат жана айлана-чөйрөнү коргоо боюнча федералдык министрлигинин өкүлдөрү жана бир катар эл аралык уюмдардын өкүлдөрү менен жолугушууларды өткөрдү.
Жолугушуулардын жүрүшүндө Кыргыз Республикасынын тоолуу аймактарды туруктуу өнүктүрүү жаатындагы эл аралык демилгелерин илгерилетүүгө жана бул багыттагы эл аралык өнөктөштөр менен кызматташууну кеңейтүүгө өзгөчө көңүл бурулду.
Кыргыз тарап тоолуу аймактарды туруктуу өнүктүрүү боюнча негизги демилгелерин тааныштырып, Австрия тарапты жана эл аралык өнөктөштөрдү Бишкекте өтө турган Экинчи глобалдык тоо саммитин даярдоого жана өткөрүүгө активдүү катышууга чакырды.
Австрия тарап жана эл аралык уюмдардын өкүлдөрү Кыргызстан менен тоо экосистемаларын коргоо, биргелешкен долбоорлорду ишке ашыруу жана тажрыйба алмашуу багытындагы кызматташууну мындан ары да өнүктүрүүгө кызыкдар экендиктерин билдиришти.
Ошондой эле жолугушууларда Кыргыз Республикасынын тоолуу аймактарды туруктуу өнүктүрүү маселелерин эл аралык деңгээлде илгерилетүүдөгү ролу барган сайын күчөп баратканы белгиленди.
