Ысык-Көл, 05.08.26 /Кабар/. Кыргызстан бүгүнкү күндө бүткүл Евразия континентинин келечегин аныктай турган стратегиялык процесстердин жигердүү катышуучусу болуп саналат. Бул тууралуу Россиянын Кыргызстандагы элчиси Сергей Вакунов Ысык-Көлдө өтүп жаткан Кыргыз-Россия экономикалык форумунун алкагындагы “Примаков окуулары” эксперттик сессиясында билдирди.
Элчи Борбор Азия аймагында болуп жаткан негизги өзгөрүүлөргө токтолду.
“Бүгүнкү күндө дал Борбор Азияда бүткүл Евразия континентинин келечегин аныктай турган процесстер өзгөчө айкын көрүнүүдө. Алар: аймактык кызматташтыктын чыңдалышы, транспорттук-логистикалык картанын жаңыланышы, экономикалык активдүүлүктүн жаңы борборлорунун пайда болушу жана региондун эл аралык саясий потенциалынын өсүшү”, — деди Вакунов.
Ал кошумчалагандай, Кыргызстан бул процесстердин борборунда тургандыктан, аймактын келечегин талкуулоо эки өлкөнүн саясатчыларынын, окумуштууларынын, мамлекеттик ишмерлеринин жана эксперттеринин катышуусунда дал ушул жерде өтүп жатканы өзгөчө мааниге ээ.
