Бишкек, 15.10.25 /Кабар/. Улуу Алтайдын археологдору алгач ирет Кыргызстанда казуу иштерин жүргүзүшөт. Бул тууралуу “Улуу Алтай” илимий-билим берүү борбору билдирди.
Маалыматка ылайык, 17–25-октябрь күндөрү кыргыз-орус археологиялык экспедициясы Чүй облусунун Кемин районуна барат. Изилдөө иштери атайын уруксаттын негизинде белгилүү кургандык комплекстердин биринде жүргүзүлөт. Бул – аталган борбордун окумуштууларынын Кыргызстандын аймагында жүргүзө турган алгачкы археологиялык казуусу болуп саналат.
Экспедицияны уюштурууга тарых илимдеринин кандидаттары Темирлан Чаргынов менен Орозбек Солтобаев баштаган Жусуп Баласагын атындагы Кыргыз улуттук университетинин адистери, ошондой эле Алтай мамлекеттик университетинин “Улуу Алтай” борборунун адистери — Алексей Тишкин, Вадим Горбунов жана Сергей Бондаренко катышууда. Иш-чарага КУУнун студенттери жана аспиранттары да тартылат.
Экспедициянын негизги максаты — Чүй дарыясынын өрөөнүнө жакын тоолуу аймактарда жашаган көчмөн элдердин маданиятын изилдөө, өзгөчө түрк доорундагы жерге берүү жана эстеликтик жайларды аныктоого көңүл буруу болуп саналат.
Казуу иштерин документтештирүүдө жана каттоодо санариптик технологиялар колдонулат. Бул ыкма келечекте алынган материалдардын негизинде деталдуу реконструкцияларды жүргүзүүгө мүмкүндүк берет. Алынган жыйынтыктар биргелешкен изилдөөлөрдүн жана көп тармактуу илимий долбоорлордун программасын түзүүгө негиз болот.
Казуу иштерин каттоо жана документтештирүүдө санариптик технологияларды колдонуу келечекте деталдуу реконструкцияларды жүргүзүүгө мүмкүнчүлүк түзүп берет. Ошондой эле алынган жыйынтыктар биргелешкен долбоорлорду жана көп тармактуу изилдөөлөрдүн программасын түзүүгө негиз болуп берери белгиленет.
“Бул экспедиция - “Улуу Алтай” илимий-билим берүү борборунун 2025-жылга карата пландалган иш-чараларынын бири болуп саналат. Алтай мамлекеттик университетинин кызматкерлери Кыргызстан аймагындагы археологиялык казууларга биринчи жолу катышып жатышат. Тажрыйбабыз пайдага жарап, ишибиз ийгиликтүү болот деп ишенебиз”,-дейт Алексей Тишкин.
