Бишкек, 11.02.26. /Кабар/. Улуттук тарых музейинин директору Жылдыз Бакашова жана “Евразия Кей Жи” коомдук фондунун директору Кымбат Урумкулова баштаган фонд өкүлдөрү менен жолугушту. Бул тууралуу Маданият, маалымат жана жаштар саясаты министрлигинен билдиришти.
Маалыматка ылайык, анда Улуу Ата Мекендик согушка арналган туруктуу экспозицияны модернизациялоо, музейди заманбап мультимедиялык жана инновациялык көргөзмө технологиялары менен жабдуу, ошондой эле Улуттук тарых музейинин базасында Инклюзия борборун түзүү маселелери талкууланды.
Мындан тышкары, музейдин илимий кызматкерлеринин Россияын алдыңкы музейлеринде такшалмадан өтүүсүн жана квалификациясын жогорулатуу боюнча кызматташуу мүмкүнчүлүктөрү каралды.
Сүйлөшүүлөрдүн жыйынтыгында тараптар маданият жана коомдук өнүгүү жаатында тыгыз кызматташуу тууралуу меморандумга кол коюшту.
