Ташкент, 15.09.25. /Кабар/. Бүгүн Ташкент облусунун Боко районундагы Чавлисай кыштагында Улуттук "Манас" театрынын жамааты жергиликтүү калк менен өзгөчө чыгармачыл жолугушуу өткөрдү. Бул тууралуу Ташкент облусунун Кыргыз маданий борборунун төрагасы Хамид Аширматов билдирди.
Концертте Манас атанын баалуулугун, кыргыз менен өзбек элдеринин кылымдарга созулган достугун жана эки өлкөнүн азыркы кызматташтык өнүгүүсүн чагылдырган программалар коюлду. Ошондой эле Боко районунун 34 жана 35-кыргыз орто мектептеринин жаш манасчылары өз өнөрлөрүн тартуулап, белгилүү манасчылардын батасын алышты.
Делегация андан соң Жызак облусундагы Манас айылына жол тартты. Театрдын чыгармачыл сапары аптанын аягына чейин Өзбекстандын башка аймактарында да уланат
Эскерте кетсек, былтыр ноябрда Чавлисайда Манас Улуттук театрынын филиалы ачылган. Боко районунда 20 миңден ашуун этникалык кыргыз жашайт жана беш кыргыз орто мектеби бар.
