Бишкек, 16.07.26. /Кабар/. Кыргызстан менен Франция саламаттык сактоо тармагындагы кызматташтыкты чыңдоодо Кыргызстандын саламаттык сактоо министри Дамир Осмонов Франциянын Кыргызстандагы атайын жана ыйгарым укуктуу элчиси Николя Фай менен жолугушуу өткөрдү.
Министрликтен билдиришкендей, тараптар медициналык кадрларды даярдоо, алдыңкы тажрыйба алмашуу, заманбап медициналык технологияларды киргизүү жана эки өлкөнүн саламаттык сактоо мекемелеринин ортосундагы кызматташууну кеңейтүү маселелерин талкуулашты.
Жолугушуунун маанилүү жыйынтыктарынын бири – Францияда квалификациясын жогорулаткан Улуттук госпиталдын төрт дарыгерине сертификаттарды тапшыруу болду. Алар оториноларингология, неврология, эндокринология жана офтальмология багыттары боюнча окуудан ийгиликтүү өтүштү.
Кыргызстан менен Франция саламаттык сактоо тармагында өнөктөштүктү мындан ары да бекемдөөгө жана медициналык жардамдын сапатын жогорулатууга багытталган биргелешкен иштерди улантат.
