Бишкек, 28.01.25. /Кабар/. Улуттук коопсуздук мамлекеттик комитети Транспорттук каражаттарды жана айдоочулук курамды каттоо боюнча мамлекеттик агенттикте кеңешме өткөрдү.
Кеңешмеге агенттиктин жетекчилиги, ошондой эле бардык аймактык башкармалыктарынын башчылары онлайн режиминде катышты.
УКМК кызматкерлери коррупцияга каршы күрөшүү чөйрөсүндөгү мыйзам актыларына киргизилген өзгөртүүлөр, тагыраагы коррупциялык кылмыштарды жасагандар үчүн күчөтүлгөн жоопкерчиликти түшүндүрүштү.
Ошондой эле 2024-жылдагы каттоо мекемелеринин тутумунда аныкталган жана бөгөт коюлган коррупциялык схемалардын айрым жыйынтыктары жана фактылары айтылды.
Жыйында өлкө жетекчилиги тарабынан 2025-2026-жылдары коррупциялык кылмыштарды толугу менен жок кылуу милдети коюлганы белгиленди. Буга байланыштуу агенттиктин кызматкерлерине коррупциялык аракеттерге же коррупциялык схемаларды уюштурууга жол берилбестиги тууралуу эскертүүлөр берилди.
