Бишкек, 07.03.25. /Кабар/. Убактылуу уюштурулган Батыш автобекетинде жүк ташуучу унааларды токтотуучу жай ачылды.
Мэриядан билдиришкендей, Бишкек шаарынын мэри Айбек Жунушалиев жана Бишкек шаардык ички иштер башкармалыгынын башчысы Азамат Токтоналиев Ош, Баткен, Талас жана Жалал-Абад облустарына каттамдар каттаган убактылуу автобекеттин аймагын текшерди.
Калаа башчысы автобекеттин аймагын көрктөндүрүү иштери менен таанышып, айдоочулардын жана ижарачылардын көйгөйлүү маселелерин жана сунуштарын укту. Ошондой эле тиешелүү кызматтарга дренаждык иштерди жүргүзүүнү жана автобекеттин аймагына шагыл төгүүнү тапшырды.
Муну менен катар, Бишкек шаардык ички иштер башкы башкармалыгына Ош базарынын жана эски батыш автобекетинин аймагында мыйзамсыз жүргүнчү ташыган таксисттерге тиешелүү чараларды көрүү тапшырылды.
Мындан сырткары автобекеттин аймагында 100 жүк ташуучу унаага ылайыкталган аянтча уюштурулуп, учурда аталган жерге күзөт посту орнотулуп, айланасына шагыл төгүлдү. Аба ырайы жылыса асфальт төшөлөт. Келечекте мекемеде май алмаштыруу, унаа жуучу, вулканизация кызматтары, ошондой эле айдоочулар үчүн ашкана ачылат.
Белгилей кетсек, жаңы оор жүк ташуучу унаа токтотуучу жай күнү-түнү иштейт.
Эске салсак, учурда №13, №40, №19 жана №32 автобус каттамдары убактылуу Батыш автобекетине каттайт.
