Бишкек, 11.08.26. /Кабар/. Бишкектин төрт районунда "Тынчтык жөнүндө" мыйзамынын талаптарынын сакталышын көзөмөлдөө боюнча рейддик иш-чаралар жүргүзүлүүдө.
Мэриянын маалыматына ылайык, текшерүүгө райондук администрациялардын, муниципалдык аймактык башкармалыктардын, санитардык-эпидемиологиялык көзөмөл жана укук коргоо органдарынын өкүлдөрү катышууда.
Анын жүрүшүндө коомдук тамактануучу жайлар, курулуп жаткан объекттер жана футбол аянтчалары текшерилди. Мыйзам бузуу фактылары аныкталган жок.
Ошондой эле мекемелердин жооптуу кызматкерлерине тынчтык режимин сактоо боюнча түшүндүрүү иштери жүргүзүлдү.
Эскерте кетсек, мыйзамга ылайык, жумуш күндөрү саат 22:00дөн 07:00гө чейин, ал эми дем алыш жана майрам күндөрү саат 22:00дөн 09:00гө чейин тынчтык сакталууга тийиш.
