Бишкек, 06.07.26. /Кабар/. Бүгүн Бишкекте Шанхай кызматташтык уюмуна мүчө мамлекеттердин Коргоо министрлеринин кеңешмесине караштуу Эксперттик жумушчу топтун XXVI жыйыны өттү.
Коргоо министрлигинен билдиришкендей, жыйынга Кыргызстан, Беларусь, Индия, Иран, Казакстан, Кытай, Пакистан, Россия жана Тажикстандын коргоо ведомстволорунун делегациялары катышты.
Иш-чаранын жүрүшүндө катышуучулар уюмдун алкагындагы аскердик кызматташтыкты өнүктүрүүнүн актуалдуу маселелерин талкуулап, аймактык коопсуздукту чыңдоо жана биргелешкен иш-чараларды даярдоо маселелерине өзгөчө көңүл бурушту.
"Сүйлөшүүлөрдүн алкагында тараптар өз ара ишеним жана тең укуктуулук принциптерине негизделген көп тараптуу кызматташтыкты кеңейтүүгө багытталган сунуштарды карап чыгышты", - деп айтылат маалыматта.
Жыйындын жыйынтыгында катышуучулар коргоо ведомстволорунун ортосундагы кызматташтыкты мындан ары өнүктүрүүгө багытталган бир катар документтерди макулдашып, Эксперттик жумушчу топтун XXVI жыйынынын расмий протоколуна кол коюшту. Бул иш-чара ШКУ өлкөлөрүнүн аймактагы тынчтыкты жана туруктуулукту камсыз кылуу боюнча биргелешкен аракеттерин дагы бир ирет тастыктады.
