Бишкек, 08.07.26. /Кабар/. Кыргызстанда мамлекеттик жана муниципалдык кызматкерлердин ишинин натыйжалуулугун баалоо системасы санариптештирилет. Бул тууралуу Мамлекеттик кызмат жана жергиликтүү өз алдынча башкаруу иштери боюнча мамлекеттик агенттик менен Түштүк Кореянын өнүктүрүү институтунун (KDI) биргелешкен Билим алмашуу программасынын жыйынтыктоочу иш-чарасында белгилүү болду.
Агенттиктен билдиришкендей, жыйынга президенттин администрациясынын өкүлү Санжарбек Жумадылов, агенттиктин директорунун орун басары Барчынай Садирова, кореялык эксперт Ким Кван Жэ жана мамлекеттик органдардын өкүлдөрү катышты.
Иш-чарада кореялык эксперттер эл аралык тажрыйбага негизделген изилдөөнүн жыйынтыгын жана төмөнкү сунуштарын тааныштырышты:
- баалоо механизмдерин өркүндөтүү;
- кызматкерлердин ишин баалоодо объективдүүлүктү жана ачыктыкты жогорулатуу;
- санариптик чечимдерди жана заманбап мониторинг системасын киргизүү.
Агенттиктин жетекчилиги кореялык кесиптештерине ыраазычылык билдирип, бул долбоордун жыйынтыктары өлкөдө кадрдык башкаруунун натыйжалуулугун арттырууга жана калкка мамлекеттик кызмат көрсөтүүлөрдүн сапатын жакшыртууга түз өбөлгө түзөрүн баса белгиледи.
