Бишкек, 16.07.26. /Кабар/. "Бишкекасфальтсервис" муниципалдык ишканасы Осмонкул көчөсүнүн Жибек Жолу проспектисинен Чүй проспектисине чейинки бөлүгүндө капиталдык оңдоо иштерин кызуу улантууда.
Муниципалитеттен билдиришкендей, учурда оңдолуп жаткан тилкенин жалпы узундугу 1 400 метрди, ал эми туурасы 9 метрди түзөт.
Долбоордун алкагында жол инфраструктурасын комплекстүү жаңылоо каралган. Маселен, көчөнүн эки тарабына тең жөө жүргүнчүлөр үчүн заманбап тротуарлар салынып, жаан-чачын сууларын натыйжалуу агызуучу ирригациялык арыктар орнотулат.
Капиталдык оңдоо иштери толугу менен аяктагандан кийин жолдун унаа өткөрүмдүүлүгү кескин жакшырып, айдоочулар менен жөө жүргүнчүлөр үчүн коопсуз жана ыңгайлуу шарттар түзүлөт.
